Hazbi LIKA
 Z. Hazbi Lika lindi më 19 prill 1972, në Tetovë. Ai është politikan shqiptar në Republikën e Maqedonisë dhe ushtrues i detyrave si deputet (2002-2003 dhe 2014-2016), Zëvendës Ministër i Punëve të Brendshme (2003-2005), Kryetar i Komunës së Tetovës (2005-2009) - mandat tejet i rëndësishëm dhe i njohur për ndryshime të medha dhe pozitive në qytetin e Tetovës. Shkollën fillore e ka kryer në vendlindje, kurse atë të mesmen e ka filluar në shkollën teknike në Tetovë dhe e ka vazhduar në Kaçanik. Që në periudhën e hershme të arsimit, si nxënës ka qenë i shquar për organizimin e lëvizjeve që mundësonin mësim në gjuhën shqipe dhe haptazi ka kërkuar mësimdhënien në gjuhën shqipe. Si pasojë e kësaj, ai që në moshë të mitur, burgoset dhe malltretohet nga policia e sistemit komunist të asaj kohe. Pas lirimit nga burgu ai vazhdon dhe mbaron shkollimin në Kaçanik. Arsimin e lartë e ka mbaruar në Universitetin e Tiranës (në vitin 1998) në Fakultetin e Historisë dhe Filologjisë - Departamaneti i Gjuhësisë dhe Letërsisë Shqipe.

Z. Hazbi Lika është i shquar për pjesëmarrje dhe ndërmarrje të lëvizjeve politike dhe ushtarake për të drejtat e shqiptarëve në Republikën e Maqedonisë dhe pavarësimin e Republikës së Kosovës. Menjëherë pas dipolimimit në vitin 1998, me fillimin e luftës çlirimtare të Kosovës, ai bëhet një nga ushtarët e parë që i përgjigjet kushtrimit të lirisë. Si ushtar në Ushtrinë Çlirimtare të Kosovës në rrafshin e Dukagjinit, dallohet për veprat e tij duke i qëndruar besnik ushtrisë deri në çlirimin e Kosovës.

Duke parë nevojën për avancimin e të drejtave të shqiptarëve në Maqedoni,, në vitin 2001, sëbashku me z. Ali Ahmetin dhe veprimtarë të tjerë tejet të shquar, themelojnë Ushtrinë Çlirimtare Kombëtare. Gjatë kësaj periudhe z. Hazbi Lika ishte i njohur me nofkën “komandant Çela”. Rregullimi i statusit të shqiptarëve së Maqedonisë dhe Marrëveshja e Ohrit, janë rezultat dhe prodhim i kësaj lufte. Z. Hazbi Lika si figurë e rëndësishme e politikës shqiptare në Maqedoni, është ndër të parët që filloi zbatimin e Marrëveshjes së Ohrit. Në vitin 2002, pas luftës në Maqedoni, në Bashkimin Demokratik për Integrim, ai paraqitet si bashkëthemelues dhe fuqi e rëndësishme politike. Në periudhën kohore 2002-2005, z.Hazbi Lika zgjedhet si Kryetar i degës për regjionin e Tetovës, ndërsa nga viti 2005-2009 ai zgjedhet si Kryetar i degës për qytetin e Tetovës. Që nga themelimi i Bashkimit Demokratik për Integrim, ai është anëtar i Kryesisë qendrore, ndërsa në periudhën mes viteve 2009-2015, ai merr edhe funksionin e Sekretarit organizativ.

Më 30.05.2017, z. Hazbi Lika zgjedhet Zëvendëskryetar i Qeverisë së Republikës së Maqedonisë përgjegjës për zbatimin e Marrëveshjes së Ohrit dhe sistemin politik.

Zëvendës Kryetari i Qeverisë